Mae DCGO yn un o 11 darparwr cyrsiau Cymraeg i Oedolion yng Nghymru ac yn cyflogi dros 70 o staff. Mae’n cynnig y gwasanaeth ar ran y Ganolfan Dysgu Cymraeg Genedlaethol, ac mae’r dyfarniad hwn gan Estyn yn cadarnhau statws y Brifysgol fel y darparwr uchaf ei safon trwy Gymru gyfan.
Gyda dros 2000 o ddysgwyr yn flynyddol yn Siroedd Conwy, Gwynedd ac Ynys Môn, mae cyfraniad y ddarpariaeth yn hynod o bwysig tuag at nod strategaeth Cymraeg 2050: Miliwn o Siaradwyr, Llywodraeth Cymru.
Ers y cyfnod clo cyntaf ddwy flynedd yn ôl, a’r symud tuag at ddysgu ar-lein yn llwyr, gwelwyd cannoedd o ddysgwyr newydd yn dysgu Cymraeg ar gyrsiau DCGO. Yn ogystal â dysgwyr o Gymru, mae nifer sylweddol o ddysgwyr o bedwar ban byd bellach yn dilyn cyrsiau DCGO yn arbennig o lwyddiannus.
Nododd fod gan DCGO “weledigaeth glir a chadarn iawn ar gyfer darparu gwasanaeth o'r safon uchaf” a’i fod “yn canolbwyntio ar sicrhau profiadau dysgu cyfoethog er mwyn cynnal cynnydd y dysgwyr”.
Wrth gyfeirio at lwyddiant y dysgwyr, canmolwyd y ffaith fod dysgwyr DCGO yn defnyddio eu Cymraeg yn y gymuned ac “...yn dangos penderfyniad i ddod yn rhan o gymunedau Cymraeg yr ardal. Maent yn datblygu’n ddysgwyr annibynnol...”.
Roedd Estyn yn canmol ymdrechion DCGO i warchod lles ei ddysgwyr ac i “roi blaenoriaeth i greu ymdeimlad o gymuned ddysgu gynhwysol” a bod y dysgwyr eu hunain wedi “datgan yn nerthol bod dysgu’r iaith o bell [yn ystod Covid] wedi bod yn fuddiol iawn i’w hiechyd meddwl a lles yn ystod y cyfnod hwn”. Yn ychwanegol at hyn, wrth sôn am y gofal a’r cymorth a roddir i ddysgwyr nododd Estyn fod y “modd y mae pawb sy’n aelod o’r gymuned glos, ofalgar hon yn llwyr ymroddedig i gefnogi pob dysgwr” yn “nodwedd arbennig”.
DCGO yw’r unig ddarparwr o blith yr 11 yn genedlaethol i dderbyn dyfarniad ‘Rhagorol’ am safon addysgu ei staff. Nododd Estyn bod y tiwtoriaid “yn darparu profiadau cyfoethog o fewn dosbarthiadau a chymunedau rhithiol sy’n cefnogi dysgwyr yn fuddiol wrth iddynt ddatblygu eu hyder i siarad Cymraeg”.
Wrth ymateb i hyn, dywedodd Cyfarwyddwr DCGO, Dr Ifor Gruffydd “y ddau beth sy’n sefyll allan i mi yn yr adroddiad hwn ydy’r ganmoliaeth uchel a roddwyd i allu ac ymroddiad y dysgwyr drwyddi draw, ac i ansawdd ein tîm o staff sy’n cynnig gwasanaeth o’r safon uchaf. Mi welodd Estyn ganlyniad y ddau beth yma sef cymuned ddysgu glos a chynhaliol lle mae’r dysgwyr yn llwyddo i ddysgu’r Gymraeg.”
O safbwynt arweinyddiaeth a rheolaeth y ddarpariaeth, aeth yr adroddiad yn ei flaen i nodi fod “gan DCGO weledigaeth glir a chadarn iawn ar gyfer darparu gwasanaeth o’r safon uchaf” a bod angerdd “dros sicrhau’r ddarpariaeth orau bosib”.
Wrth i gyfyngiadau Covid gael eu llacio ymhellach gan Lywodraeth Cymru, mae Dr Gruffydd rŵan yn edrych ymlaen at gael cynnig gwersi wyneb yn wyneb unwaith eto, yn ogystal â pharhau gydag arlwy ar-lein. “Yr hyn sy’n braf rŵan ydy edrych ymlaen at fedru cynnig dewis i’n dysgwyr cyfredol ni ac i ddysgwyr newydd, ac mae’r adroddiad hwn gan Estyn yn rhoi sicrwydd iddyn nhw fod yr hyn sy’n cael ei gynnig gennym ni drwyddi draw o'r safon uchaf un.”
-
Ewch i www.dysgucymraeg.cymru/go i wybod mwy am DCGO.
